غشيم في المغازله ((اتحدى احد يقراها ومايضحك))

بسم الله الرحمن الرحيم

ارجو من الذي يريد الرد ليزيد مشاركاته عدم الرد لأني اريد ان اشعر ان قصتي اعجبتكم

شاكره لكم

المهم وانا في عز النوم والسعابيل وإلا فجأة رن التليفون وطبعا تلفوننا شايل أبوي منه كل الأرقام مو بمخلي إلا رقمين التسعة والثمانية يعني مالك إلا تدق على الشرطة ولا الدفاع المدني وغيره مافي , المهم إني رفعت السماعة وأقول نعم وإلا ذاك الصوت إلي يرد الروح وصوت بنت وأخوك إذا سمع صوت بنت أوجعة بطنه و قالت: ألو انا ماعاد عرفت وش أقول إنشلة براطمي وطلعت كأني ياسر عرفات :ألووووو , قالت: مين معايا قلت معاكي انا <<صراحة جواب يدل على ذكائك >> وهي إلي تضحك وأنا قلبي أحسه مو بطبيعي , وقالت لي: سوسو موجودة قلتلها ماينفع طوطو قالت مين طوطو قلت: هذا قسم الدلع حق الطاووس ألي هو انا وضحكت للمرة الثانية على التوالي وقالت يويو شكلي غلطانه طيب آسفه قلتلها لا عادي شكرا على واجب دايم اسمع هالكلمة وجالس احتري الفرصة إني اقولها وقفلت السماعة تصدقون مادري وش صار فيني حسيت بقشعريرة في جسمي وإن إفرازات الخشم عندي زادت وأنا ودي أروح أنبطح في الحوش وأكتب قصيدة هجائية لايكون هذا هو الحب ألي يقولون عنه
المهم عاد انا مني متعود على البنات لأنه ماشاء الله بيتنا فيه خمسة عشر رجال إلي هم أنا وأخواني وابوي وامي
يعني انا واخواني ماشفنا بنت أبدا وهذ اللي مسبب لنا عقدة تسمى العقدة الفسيلوجية
المهم إني قررت أتعرف على بنات بس في مشكلة وحده اللي هي اني ماعندي أسلوب أبدا << يعني وقفت على الأسلوب انت عندك ألف مشكلة واهمها مشكلة وجهك اللي كأنه لوحة إنتبه أمامك نقطة تفتيش >>
المهم اني مالقيت إلا واحد قدامي من العيال إسمه عبدوش معروف انه البنات مايعوقون معاه وانا اللي القط مفتاح سيارتي واروح له . المهم رحت لعبدوش وكلمته عن وضعي وأنوا نفسي اتعرف على بنت قبل لاأموت <<أخص يالشايب >> فقالي السالفة بسيطة إذا بغيت البنت تحبك حسسها إنها أحسن وحده في العالم قلت له: يعني اقولها أنتي احسن من مردونا .. وألايرفزني برجله في بطني وقال لي انت ثور وش دخل مردونا ياغبي انا قصدي انك تحسسها بأنوثتها وإنو مافي بنت غيرها في العالم , قلت له : برضوا مافهمت يعني تبيني أذبح كل بنت وأخليها أهي لحالها .. وهو اللي يموه عليه برجله ويمحطني بيده على وجهي وقال لي : شوف إنت حمار مارح تفهم إلا بالدروس العملية ويطلع جواله ويدق ويقول لي شوف انا الحين بكلم وحده وإتعلم قلت له: طيب وكلم وقال: هلا حياتي هلا عمري هلا روحي أنا لؤي معاكي حبيبك ومجنونك <<الحمدلله على العقل لعن أبوك وين لؤي معاكي والله لو شفت وجهه في أحسن الأحوال عطيته اسم جعفر قال لؤي قال>> وقام يقو لها أحبك وأموت فيك وانا بدونك مثل البيت بدون حارة ومثل التليفون بدون حرارة ومثل السواق بدون سيارة ..
وانا البنزين وانت الشرارة انا الشارع وانتي الأنارة انا الرومنسية وانت الإشارة انا مبنى التجارة العالمي وانت الطيارة .
أقسم بالله إني بغيت أضمه وأبوسه يوم سمعت كلامه حسيت بشعور غريب لعن إبليسه لو بيكلم جدار كان ذاب المهم إنه خلص المكالمة وإلتفت لي وقال يالله دورك بعطيك رقم بنت وكلمها وقول لها نفس كلامي قلت له بكل خجل طيب , وهو اللي يدق على البنت ويعطيني الجوال عشان اكلمها وانا اللي اقول ألو ويوم سمعت صوتها ضاقت علومي ونسيت كل الكلام وقلت لها بابا فين وماحسيت إلا بذيك الجزمه إلي تلصق في وجهي وقال لي قول لها نفس اللي قلته يالثور وانا اللي اقول هلا حياتي هلا روحي هلا تعالي قالت طيب وبعدين قلت لها انا بدونك مثل الكمبيوتر بدون فارة مثل التقاطع بدون إشارة مثل الحمار بدون حمارة مثل السلطة بدون خيارة وانا محترف وانتي نظام الإعارة وانا ولاعة وانتي سيجارة انا الدتسن وانتي الغمارة انا الصرصور وانتي البيارة
انا طوط طوط طوط طوط قفلت الخط في وجهي قال عبدوش وش فيك قلت لا أبد الخط مشغول <<مايعرف يصرف بعد>> وما دريت إلا عبدوش مطلع لوح فيه مسامير ويذبحني فيه ألين قلت للعنز ياخالة
المهم إني رجعت للبيت ودمي تصب ووجهي من كثر اللصق اللي جاني من عبدوش لدرجة إن اللي بيشوفني مايعرفني طالع كأني مسابقة من صاحب هالصورة اللي يحطونها في المجلات وانا إلي داخل البيت بشويش عشان مايشوفني أحد وأطلع غرفتي واسكر الباب وأنام وفي عز النوم دق جرس التليفون وارفع السماعة وإلا هي نفس البنت إلي كلمتني اول مرة , قلت نعم قالت سوسو موجودة قلت لها شوفي بيتنا كله شباب وما في احد بحرف السين انا وأخواني كلنا إسمنا خالد ومافي الا أخوي الصغير فهد إسمه نايف ونناديه عبد الرحمن
وما تسمع إلا البنت تكركر من الضحك وقالت ماشاء الله دمك خفيف هي تحسبني استهبل مادرت اني دلخ من جد قلت لها شكرا <<مسوي مأدب الأخ>> وسألتني البنت وش تسوي دحين قلت لها والله كنت نايم قالت يويو تنام في الليل انت . قلت أجل متى أنام ؟ قالت انا انام في النهار وأصحى في الليل قلت لها ليش الأخت بومة؟ قالت لا بس الليل وقت الرومنسية إنت تعرف الرومنسية ؟ قلت لها لا والله ماأعرف بنات أنا <<مسوي فيها فهيم>> سألتني إنت وش اسمك قلت لها مصيول قالت وش معناه قلت لها هذا إسم كلب كان عند جدي وسماني أبوي عليه لأني اشبهه وسألتها انت وش اسمك قالت دليدا قلت لها انا ابغى اعرف إسمك مو عيارتك قالت هذا إسمي <<هذولي البنات تسأل الوحده وش إسمك تقول رهف ولا شوق ولاأفنان >> وقلت لها اني حبيت وحده بس إنتهى هالحب لأن اللي حبيتها خانتني قالت لي مين حبيت قلت لها حبيت عنز جيراننا بس إنها خانتني مع تيس سوري عشان له قذلة, المهم ان البنت قالت لي اوكي اكلمك بكرة لأن امي تناديني قلت مو مشكلة وتطورت العلاقة وسرنا نكلم بعضنا كل يوم وانا أنقلب حالي ولاحظوا أهلي اني تغيرت يعني نكون جالسين على الغذاء ولا العشاء وانا ماآكل اكون سرحان ولاحظوا أهلي اني سرت مؤدب وأقرأ واجد علشان اعرف كلام جديد في الحب تلقاني اقرأ كتاب الشعر والحب والطبخ لاتستغربون لأن كتب الطبخ أتعلم منها كلام حلو مثل ياعسل ياحليب ياقشطة ياكريم كراميل وبرضوا صرت أدخل كتب ممنوعة للبيت مثل كتاب ماذا تفعل ليلة الدخلة وكتاب سنة اولى زواج بس المشكلة إنه ضاعت مني الكتب وصرت أروح عند بيارة جارنا إلي طافحة وأقعد أفكر وارمي الحصة مثل الي يجلسون على البحر ويرمون حصى
و يوم من الليالي قالت لي البنت مصيول اوصف لي شكلك يالله يالبلشة وش اقول لها هالحين أقول لها اني قرد اعترف لها بالحقيقة المره ولا أقولها اني جدار مالي ملامح ولا أقولها اني شبيه عبد الله سليمان <<الحمدلله والشكر>> المهم اني قلت لنفسي ياواد خليني أسوي مثل كل الشباب وأكذب عليها يعني تلقى الواحد من الشباب شين وإذا شفته في الشارع ماتدري هو رايح ولا جاي لأنه وجهه ماله معالم لو تشوف وجهه تحسبه واحد معطيك قفاه يعني مفروض يحط لوحه على وجهه يكتب عليها ترى هذا وجهي عشان الناس مايلخبطون بين وجهه وقفاه وانا مثلهم وأردى بعد وانا إذا قابلت احد يجلس محتار ساعة وين وجهي ووين قفاي ومايعرف إلا إذا شاف الورقه لأني فيني ورقة مثل اللي في السراويل والفنايل عشان تعرف أهي ورا ولا قدام <<من جد الحمدلله والشكر>>
المهم اني قلت لها اني عيون مثل عيون جواد وطولي مثل طول طلال الرشيد وخشمي مثل خشم خالد عبد الرحمن وملحي مثل ملح راشد الماجد ومهضوم مثل رامي عياش <<والله مابقي إلا تحط معاهم ملحن وتكمل>>

المهم ان البنت شكلها طقت معاي وصارت تشاهق من الفرحة وسألتها انت اوصفي لي شكلك قالت انا ماأقدر لمن تشوفني تعرف لأني مالي شبيه <<أخص يابرتني>> يعني بشوفك قالت أكيد انا بكره بروح شاليهات اليمامة اللي على طريق الرياض الخرج ونتقابل هناك قلت لها بس هديك للعوائل قالت عاد انت دبر نفسك قلت أوكي مو مشكلة بس كيف أعرفك قالت بيننا جوال إذا وصلت كلمني قلت لها خلاص ألقاكي هناك
المهم اني توهقت وش لون ادخل الشاليهات وهي للعوائل قلت مالي إلا عبدوش اتصل عليه واتفاهم معاه ودقيت عليه ورد عليه بعصبيه وقال وش تبي ياغبي وعلمته بالسالفه من سلسل الين طقاق (تراني اقصد من طقطق لسلام عليكم بس مدلخ شوي) وقال لي والله صعبه ايش تبي تسوي قلت له وش رأيك تلبس عبايه وتسوي نفسك حرمة وتروح معايا على انك زوجتي قال ياويلي ويلاه وانا ولد ابوي هذا شيء صعب ماأقدر أسوي نفسي حرمة
وش اقول للجماعة قلت له مين إحنا بنروح لشاليهات مب لعرس وانت مارح تكشف وجهك أبدا قال طيب انت ليش ماتسوي حرمه قلت له مايسيير لأني لا رجال نافع ولا حرمه نافع وبعدين حتى لو غطيت وجهي بيكشفوني من ريحتي اللي كأنها شرابات عزوبي قلت له ابشر بكر جهز نفسك وبمرك ونروح وأخذ سيارة واحد من الشباب
ورحت بيت عبدوش والقى عند باب بيتهم شحاته وهي تجي تبغى تركب قلت لها الله يعطيك ويعطينا وهي اللي تدق قزاز السياره شوي وتكسرها وانا اطلع من جيبي ريال ونصف كنت ابغى اشتري تويكس بس قلت يالله اعطيها علشان الله يوفقني وافتح الشباك إلا تقول لي افتح الباب الله يكسر رأسك وانا اقول هالصوت ماهو بغريب علي يوووووووو عبدوش قال آيه أفتح قبل لا يطلع احد من أهلي إفتح وفتحت له وركب وانطلقنا للشاليه ونزلنا من السيارة وأمسك يد زوجتي إلي هي عبدوش سابقا ودفعنا التذاكر ويوم جينا ندخل وقف الحارس إلي على الباب وقال لحظة لازم زوجتك تدخل تفتيش الحريم قلت ليش مطار قال لاياخوي بس شاكين فيها ولا مين الحرمه الي تلبس زبيريات وانا اناظر في رجول عبدوش إلا هو لابس زبيريات يالله لا تفضحنا وانا اقول للحارس ممكن تتركني وحدي مع زوجتي ابيها في كلمة رأس قال أدخل الغرفه الفاضيه وتفاهم معاها وانا اللي اسحب عبدوش وادخل الغرفة وادوس في بطنه وانواع الأكواع لعن ابوك زبيريات مره وحده قال وش اسوي مالقيت جزمه كعب بمقاسي قلت له نزل العبايه على رجولك علشان محد ينتبه يالغبي المهم رحنا للحارس ودفينا له مية ريال عشان يسكت واول شيء سويته بعد مادخلت استأجرت شاليه صغير وقلت لعبدوش اقعد ولا تطلع وانا بدور على خويتي وطلعت ودقيت عليها ووصفت لي مكانها وتقول إنا عند شجرة اللي جمب المطعم وانا اروح هناك واجلس ادورها ساعتين ومالقيتها وادق لها جوال واقولها وينك لي ساعتين ادوع عليك قالت انت وينك بالضبط قلت لها انا واقف جمب كيس زبالة وانتي وينك قالت انا واقفه جمب واحد شكله مجنون وانا اتكلم واطل وراي اف هذي هي طلعت انا المجنون واهي كيس الزبالة وهي الي تنصدم وقالت هذا انت وين الوصف اللي توصفه وين طلال الرشيد أمحق طلال اللي تشبه لاانا فعلا مثل ماقلت بس صار لي حادث وهو اللي أثر في وجهي والا انا كنت حلوه <<آيه هين>> قالت مو مشكلة اهم شيء اسلوبك عجبني قلت اشوى انه اعجبك وقلت لها وريني وجهك قالت طيب بس لاأحد يشوفني وانا اللي اغطي عليها واقول يالله بسرعة وهي اللي ترفع الغطوة وانا اللي أضحك قالت وش فيك تضحك قلت لها يالله بسرعه شيلي القناع اللي على وجهك بلا استهبال وهي اللي تقول ايش فيك هذا وجهي وانا اللي انصدم وتدور فيني الأرض وش ذا الوجه الشين وانا كنت حاط في بالي كلام رومنسي جلست عشرين يوم احفظ فيه بس يوم شفت وجهها قمت الخبط فيه
سألتها ليش الغمض ساكن في عيونك قالت من الأرق وسألتها طيب وش البيبسي اللي مكبوب على ثوبك قالت هذا مو بيبسي هذا مرق سألتها طيب ماعندك غيره قالت كان عندي بس انسرق سألتها طيب مادامك شينه ليش تغازلين قالت انا كنت حلوه بس وجهي لنحرق وسألتني وش رأيك فيني ماأشبه0 باسكال قلت انتي جسمك زي باسكال بس الوجه الله خلق وفرق
المهم اني ماقدرت اتحمل وجهها قلت انت جدك الأكبر كان غوريلا قالت لي تتطنز انا اول كنت مصدقه انه الديناصورات إنقرضت بس من يوم شفت وجهك عرفت ان الكلام إشاعات قلت لها شوفي ياآنسه جرادة انا نفسي اجاملك واقول لك كلام حلو بس وجهك مايساعد قالت لي حتى انا نفسي اقول لك كلام حلو بس وجهك مايساعد وجهك كأنه دعايه للمخدرات..

المهم كل واحد تفل في وجه الثاني ورحنا وانا من الصدمه ركبت السيارة ورجعت البيت وانا متحطم كانت امالي انها تشبه مايا نصري ولاآليسا طلعت مثل فطومه .. لالا ماعاد ابغى اتعرف على بنت تكفه آخر مره <<لاياشيخ حرام تحطم قلوب المعجبات ياراغب علامة أقول أنطم بس>>
المهم اني سكرت الباب ونمت نومه ومادريت الا اليوم الثاني ألا ابوي يرفز الباب وانا اللي قفزت من فراشي وماادري وش السالفه إلا هو ابوي يصايح إفتح الباب
إفتح الباب لابارك الله فيك وانا الي افتح الباب والا ابوي في وجهي في وجهه مايطمن ويطلع ديك العجرة من مخباه وانواع التلحيط وأخواني وامي واقفين عند الباب يتفرجون الأنذال (لقيوها مصارعه على الطبيعة)
المهم وابوي شغال ضرب فيني ويقول تتزوج من ورانا يالخسيس قلت له والله متزوجت قال إلا لأن الشاليهات اتصلوا وقالوا خلو المصيول يأخذ زوجته الي نساها , وانا اللي تضيع علومي وابي افهم ابوي السالفه بس انه شغال ضرب فيني ماترك لي فرصة..
وبعد جهد جهيد قدرت انفك من ابويا ورحت لأخر غرفة ويأخذ ابوي نعاله ويرميه عليه واوحز عنها بسرعه وامسكها بفمي متأثر بالأفلام واخواني يوم شافوني اسوي هالحركة قاموا يصفقوا ويصفروا لي وانا اتحمس وانط على ابويا نطه منومة وخربتها مع ابوي وينط واحد من اخواني على ابوي ويمسك يده ويرفعها اول مره طاحت ثاني مره طاحت ثالث مره وطاح لا لا لا غير معقول رفع ابوي يده وقام يأشر باصباعه تراني مانمت ويوم شفته مانام وانا أقوم وامسك رجوله واسوي له حركه مقصيه عشان يستسلم بس ماأستسلم واخواني يقنعوه يستسلم بس هو عنيد يحاول يزحف عند الحبال بس انا ماخليته يتنفس وبسرعه ماأشوف إلا تدخل خارجي امي جايبى المقلاه ومحطتني على وجهي محطه مدويه , وتدخل أخواني ومسكوا أمي وطلعوها برة الحلبه <<عائلة دلخة>>
المهم اني دخت وماأدري وين انا وماأشوف إلا ابوي زاحف ويحط يده فوقي واخواني يعدو واحد اثنين ثلاثه وابوي اللي فاز..

المهم اني فهمت ابوي السالفة ونمر على بيت ابو عبدوش ونعلمه السالفه وبعدين رحنا للشاليهات ودخلت لعبدوش وقلت له معايا لك مفاجأة قال والله اني خابرك ذيب ماتترك خويك أكيد بتعرفني على وحده من أخواتها (آيه صح انا بعرفك على وحده من أخواتها بتشوف المفاجأة بنفسك) وهو شوي ويبي يفصخ العبايه قلت له خليك كذا أحسن <<من جد نذل>> وصلنا للسيارة إلا وابو عبدوش ماسك مفتاح العجل في يده ويحتري ولده ..
وعبدوش من هول الصدمة ماعاد شالته رجليه وقام يصيح ياويلي ويلاه وأستلمه ابوه أنواع تفقيع الوجه وأنواع الترقيع والتنزيل وانا جالس أتفرج ومبسوط مادريت إلا أبوي ماسكني وأنواع الركب

وانا أصيح فيه هي ياابو الشباب حلا هي توك طاقني قبل شوي قال آيه صح بس عيب الرجال يطق ولده وانا جالس أتفرج لازم أسوي شيء انا بعد (لا صراحة طلع أبوي فاهم في الأصول طالع لي)

المهم بعد الطق اللي أكلته انا وعبدوش تزاعلنا مع بعض وانا حرمت أتعرف على بنات ومثل مايقول المثل أبعد عن كل الشر ياعمري وغنيله :ودان دان اللي دانه .. مشكلني حبك ياروح الروح مشكلني ياليت البنات اللي مع راشد في الفيديو كليب أروح طحينه معاهم <<شكله ماتاب ناوي ينطق مره ثانية>>

للأمانه منقووول

تحياتي

عاشقة عبدالرحمن